Bilkhawthlir, 15th August, 2026: Vawiin khan Mizoram hmun hrang hrang ah India Zalenna Ni (Independence Day) vawi 80-na lawm a nih angin, Bilkhawthlir Community Hall kawtah pawh urhsun takin lawmna hun hman a ni.
He hun hi zing dar 8:00 AM ah tan niin, Bilkhawthlir BDO, Pu Samuel Lalmalsawma Sailo, MCS chu Khuallian (Chief Guest) niin hnam puanzar a pawt phar a, khuallian chuan he ni ropui takah hian India-in zalênna kan neih theihna tura beitu, hruaitu ropui tak takte bakah India ramin zalênna ahmuhna ni champha vawi 80 kan hmang thei hi lawmawm atih thu a sawi a . Zirlaite chu zirna kawnga tan la thar tura fuihin Bilkhawthlir in Kum 2026-a MPSC exam buatsaih a Jr Grade of Mizoram Engineering Service (MES) a in ziak tling kan nei chu lawmawm a tiin zirlaite tan chona nasa tak siamtu nise a duhthu a sawi a ni.
Block chhunga Sawrkar Department hrang hrang te chu an hnathawh ah lawmthu a sawi rualin an hnathawh te chu mipui rawngbawlna a ni tih hria a tan la thar zel turin a fuih a; mipui te pawh sawrkar Department-te thawhpui a, hmang tangkai tu nih tum tlat turin a chah bawk a ni. Khuallianin thu a sawi zawh hian Zirna leh infiamna lama mi hlawhtling mi pahnih Er. Chuaungurpuia Pachuau S/o Pu PC Lalmalsawma, Kualmawi, Bilkhawthlir kum 2026 MPSC exam buatsaih a Jr Grade of Mizoram Engineering Service (MES) leh Pu Zohmingthanga s/o Pu Lalhmingmawia , Gold Medal , 1st Sikkim open International Taekwondo Championship (Senior under 54 kg ) te hnenah lawmpuina hlan an ni.
He Independence Day lawmna hunah hian Bilkhawthlir RD Block chhunga Sawrkar hnathawk te, Police personnel-te, Village Council (VC) leh NGO aiawh te, Political Party hrang hrang aiawh te, zirtirtu leh zirlai te bakah Ex-Servicemen te rawn tel theiin, hun hlawhtling leh hlimawm tak hman a ni a, He hun hlu tak khár nan hian, a lo kal zawng zawngte pualin thingpui ruai tuihnai tak buatsaih a ni.
